சர்ஜுன்.கே.எம். இயக்கத்தில் நயன்தாரா நடிப்பில் உருவாகி இருக்கும் ‘ஐரா’ திரைப்படத்தின் படப்பிடிப்பு முடிந்துவிட்ட நிலையில், திரைப்படத்தின் டீசர் குறித்த அறிவிப்பை படக்குழு தற்போது வெளியிட்டுள்ளது.‘லட்சுமி, ‘மா’ ஆகிய குறும்படங்களையும், ‘எச்சரிக்கை இது மனிதர்கள் நடமாடும் இடம்’ என்ற திரைப்படத்தையும் இயக்கிய சர்ஜூன்.கே.எம். அடுத்ததாக நயன்தாராவை வைத்து ‘ஐரா’ என்ற திரைப்படத்தை இயக்கியிருக்கின்றார்.
கே.ஜே.ஆர். ஸ்டூடியோஸ் சார்பில் கோட்டப்பாடி ஜே.ராஜேஷ் தயாரித்துள்ள இத்திரைப்படத்தின் படப்பிடிப்பு சமீபத்தில் முடிந்ததுள்ளது.
இந்நிலையில், திரைப்படத்தின் இரண்டாவது போஸ்டரை வெளியிட்டுள்ள படக்குழு, திரைப்படத்தின் டீசர் ஜனவரி 5ஆம் திகதி மாலை 5 மணிக்கு வெளியாகுமென்று அறிவித்துள்ளது.
இத்திரைப்படத்தில் நயன்தாரா முதல் முறையாக இரட்டை வேடங்களில் நடித்துள்ளார். இதனால், திரைப்படத்தின் மீதான எதிர்பார்ப்பு அதிகரித்துள்ளது.
இத்திரைப்படத்தில், கலையரசன், யோகிபாபு, ஜெயப்பிரகாஷ், லீலாவதி உள்ளிட்ட பலரும் முக்கிய கதாபாத்திரங்களில் நடித்துள்ளனர். கே.எஸ். சுந்தரமூர்த்தி இசையமைக்கிறார். சுதர்ஷன் சீனிவாசன் ஒளிப்பதிவு பணிகளை மேற்கொண்டுள்ளார்.
இத்திரைப்படம் எதிரவரும் மார்ச் மாத இறுதி அல்லது ஏப்ரல் மாத ஆரம்பத்தில் வெளியாகுமென்று எதிர்பார்க்கப்படுகின்றது.
இதேவேளை, நயன்தாரா அஜித்துடன் ‘விஸ்வாசம்’, விஜய்யுடன் ‘தளபதி 63’, ராஜேஷ் இயக்கத்தில் சிவகார்த்திகேயன் நடிக்கும் திரைப்படம், சிரஞ்சீவியுடன் ‘சயீரா நரசிம்மரெட்டி’ மற்றும் நிவின்பாலியுடன் ‘லவ் ஆக்சன் டிராமா’, ‘கொலையுதிர்க்காலம்’ உள்ளிட்ட பல திரைப்படங்களில் நடித்துவருகின்றமை குறிப்பிடத்தக்கது.
