முன்னாள் ஜனாதிபதி பிரணாப் முகர்ஜி, நானாஜி தேஷ்முக், பூபேன் ஹசாரிக்கா ஆகியோர் நாட்டின் மிகவும் உயரிய விருதான ‘பாரத ரத்னா’ விருதுக்கு தெரிவு செய்யப்பட்டுள்ளனர்.

கல்வி, சுகாதாரம் மற்றும் கிராமப்புறங்களின் தன்னிறைவு ஆகியவற்றுக்காக தொண்டாற்றிய பிரபல சமூகச்சேவகரான நானா தேஷ்முக் பாரதிய ஜனசங்க தலைவர்களில் குறிப்பிடத்தக்க ஒருவராவார்.

கடந்த 2010-ம் ஆண்டு காலமான இவர் நாடாளுமன்ற, மாநிலங்களவை உறுப்பினராக பணியாற்றியுள்ளார். இவர் இதற்கு முன்னர் பத்ம விபூஷன் விருதும் பெற்றுள்ளார்.

அசாம் மாநிலத்தை சேர்ந்த பூபேன் ஹசாரிக்கா பிரபல கவிஞர், பாடலாசிரியர், இசையமைப்பாளர், பாடகர், திரைப்பட தயாரிப்பாளர் என பன்முக திறமைகள் பெற்றவராவார். கடந்த 2011-ம் ஆண்டில் இவர் காலமானார்.

நாடாளுமன்ற உறுப்பினராக பல ஆண்டுகள் பணியாற்றிய அனுபவம்பெற்ற முன்னாள் ஜனாதிபதி பிரணாப் முகர்ஜி(83), காங்கிரஸ் கட்சி தலைமையிலான மத்திய மந்திரிசபைகளில் நிதி, ராணுவம் மற்றும் வெளியுறவுத்துறை அமைச்சராக பணியாற்றியுள்ளார் என்பது குறிப்பிடத்தக்கது.