கடந்த 21 ஆம் திகதி ஈஸ்டர் ஞாயிற்றுக்கிழமை
நடைபெற்ற தாக்குதல்களை அடுத்து நடத்தப்பட்ட விசாரணைகளில், பயங்கரவாத குழுவிற்கு வெளிநாடுகளிலிருந்து பெரும் தொகை நிதி வழங்கப்பட்டுள்ளமை வெளிப்படுத்தப்பட்டுள்ளது.

வெளிநாடுகளில் இருந்து அனுப்பப்பட்ட பெருமளவிலான நிதிகள், பயங்கரவாதிகள் மற்றும் தற்கொலை குண்டுதாரிகளின் வங்கி கணக்குகளில் வைப்பிலிடப்பட்டுள்ளன என கிடைக்கப்பெற்ற தகவல்களின் மூலம் அறியமுடிகின்றது.

குறித்த வெளிநாட்டு நிதி உதவிகள் குறித்து முழு தகவல்களை பெற்றுக்கொள்ள அதிகாரிகள் விசாரணைகளை மேற்கொண்டுள்ளனர். இருப்பினும் விசாரணைகள் இன்னும் நடைபெற்று வருகின்ற நிலையில் இலங்கைக்கு நிதியுதவி வழங்கிய நாடுகளின் பெயர்களை பொலிஸார் இதுவரை வெளிப்படுத்தவில்லை.

அண்மையில் வெளியான தகவல்கள் Bitcoin ஊடக இலங்கைக்கு தற்கொலை குண்டு தாக்குதல் நடத்த ஐ.எஸ்.ஐ.எஸ். அமைப்பு நிதி வழங்கியதாக தகவல்கள் வெளியாகின.

குறிப்பாக இந்த தாக்குதலுக்கு முன்னர் டொலர்கள் என்ற பெயரில் Crypto நாணயத்தை மாற்றுவதாக தகவல் கிடைத்ததாக வைட்ஸ்ட்ரீம் நிறுவனத்தின் இணை நிறுவனர் இஷ்டிக் லெவி தெரிவித்திருந்தார்.

குறித்த தாக்குதல் நடத்தப்படுவதற்கு முதல் நாள் அதாவது 20 ஆம் திகதி, Coin Payments மூலம் Bitcoin சமநிலை நூற்றுக்கணக்கான சதவிகிதம் உயர்ந்துள்மையை விசாரணைகளின் மூலம் அறிந்துகொண்டதாக தெரிவிக்கப்பட்டுள்ளது.

அந்தவகையில் பிரதான இருப்பு ஏப்ரல் மாதம் 20 ஆம் திகதி 500,000 டொலர் முதல் 4.5 மில்லியன் டொலர் வரை உயர்ந்தது என்றும் இதன் பின்னர் தாக்குதல் நடத்தப்பட்ட அன்று அதன் விகிதம் மீண்டும் வழமைக்கு திரும்பியதாகவும் வைட்ஸ்ட்ரீம் நிறுவனத்தின் விசாரணைகள் தெரிவிக்கின்றன.

இதேவேளை Bitcoin மற்றும் கண்காணிக்கப்படாத சர்வதேச பண பரிமாற்றங்கள் ஆகியவை பயங்கரவாத குழுக்கள் பயன்படுத்த மிகவும் சிறந்த ஒரு தளமாக அமைகின்றன என இஸ்ரேலிய உளவுத்துறை கூறியிருந்தது.

அத்தோடு கடந்த இரண்டு ஆண்டுகளில், ஐ.எஸ்.ஐ.எஸ். Bitcoin மூலம் நன்கொடைகள் திரட்டி பாரிய நிதியுதவிகளை பெறுவதற்காக பிரசாரத்தை மேற்கொண்டதாகவும் வைட்ஸ்ட்ரீம் நிறுவனம் தெரிவித்துள்ளது.

மேலும் இதற்கான பணபரிவர்தனைகள் அனைத்தும் ஒரு பிரத்யேக வலைத்தளத்தின் ஊடாகவே செய்யப்பட்டுள்ளதாகவும், ஆனால் உலக நாடுகள் கண்காணிப்பதை தடுக்க டொமைன் முகவரி அடிக்கடி மாற்றப்பட்டது என்றும் தெரிவிக்கப்பட்டுள்ளது.

இந்நிலையில் தங்கள் நிறுவன மூலம் பணப்பரிமாற்றம் செய்யப்பட்டது என கூறிய Bitcoin நிறுவனம், அந்த பணபரிவர்தனைகளில் ISIS உடன் தொடர்பு இருக்கின்றது எனும் தகவலை மறுத்துவிட்டமை குறிப்பிடத்தக்கது.