அவுஸ்ரேலியாவில் இன்று இடம்பெற்ற பொதுத் தேர்தலில் பிரதமர் ஸ்கொட் மொரிசனின் தலைமையில் போட்டியிட்ட லிபரல் தேசிய கூட்டணி இதுவரை வௌியான பெறுபேறுகளின் படி வரலாற்று ரீதியான வெற்றியை பெற்றுள்ளது.வாக்குப்பதிவுகள் இன்று காலை 8 மணி முதல் இடம்பெற்று வந்த நிலையில் இறுதி தேர்தல் முடிவுகள் முழுமையாக அறிவிக்கப்படாத நிலையில் 70 சதவீதமான வாக்குகள் எண்ணப்பட்டுள்ளன. இதன்படி, 2019 ஆம் ஆண்டுக்கான பொதுத்தேர்தலில் லிபரல் தேசிய கூட்டணி முன்னிலை பெற்றுள்ளதாக அறிவிக்கப்பட்டுள்ளது.
76 தொகுதிகளில் லிபரல் கூட்டணி 74 இடங்களில் பெரும்பான்மை பெற்றுள்ளதுடன் தொழிற்கட்சி வெறும் 66 இடங்களை மாத்திரம் தனதாக்கிக் கொண்டுள்ளது.
முன்னதாக நடத்தப்பட்ட வெளியேறும் கருத்துக்கணிப்புகள் ஆறு ஆண்டுகளில் முதல் முறையாக தொழிற்கட்சி வெற்றி பெறும் என பரிந்துரைத்தன.
இதனிடையே. தனது தோல்வியை ஏற்றுக் கொண்டு எதிர்கட்சியான தொழிற்கட்சியின் தலைவர் பில் ஷோர்டன் தனது பதவி விலகலை அறிவித்துள்ளார்.
அதேவேளை, இன்று நடத்தப்பட்ட பொதுத்தேர்தலில் தன்னையும், லிபரல் கூட்டணியைும் மீண்டும் தெரிவு செய்தமைக்கு வாக்காளர்களுக்கு பிரதமர் ஸ்கொட் மொரிசன் நன்றி தெரிவித்துள்ளார்.
இந்த பெறுபேறுகளை தான் எதிர்பார்க்கவில்லை என்றும், மகிழ்ச்சி கலந்து அதிர்ச்சியுடன் தனது கட்சியினர் இருப்பதாகவும் அவர் குறிப்பிட்டார்.
லிபரல் கூட்டணி பெரும்பான்மை அதிகாரத்தை கைப்பற்றுவதற்கான தருணத்தை நெருங்கி வரும் நிலையில், எந்த தருணத்திலும் அற்புதங்களின் மீது நம்பிக்கை கொண்டிருப்பதாக பிரதமர் தனது ஆதரவாளர்களிடம் தெரிவித்துள்ளார்.
